فەۆشی تەلەفۆنی، بازاڕی کوردستان، فرۆش، تۆنی دەنگمان، قسەکانمان. Archives

چۆن تۆنی دەنگ لە فرۆشی تەلەفۆنیدا مامەڵەکان یەکلایی دەکاتەوە؟ لە بازاڕی هاوچەرخی کوردستاندا، پێشبڕکێی نێوان کۆمپانیاکان گەیشتووەتە لووتکە. کاتێک کڕیارێک بە تەلەفۆن پەیوەندی پێوە دەکەیت، تۆ ناتوانیت بە: جلوبەرگێکی ڕێکپۆش. بزەیەکی سەر لێو. شوێنێکی ڕازاوە. سەرنجی ڕابکێشیت. لەو چرکەساتەدا، تۆ تەنها یەک ئامرازی سەرەکیت لەبەردەستدایە بۆ نواندنی پرۆفیشناڵیی خۆت و کۆمپانیاکەت، ئەویش (تۆنی دەنگتە). توێژینەوەکانی بواری پەیوەندی و فرۆشتن دەری دەخەن کە لە پەیوەندییە تەلەفۆنییەکاندا،: تەنها %١٣ی کاریگەرییەکە پەیوەندی بەو (وشانەوە) هەیە کە دەیانڵێیت، لە کاتێکدا %٨٧ی کاریگەرییەکە ڕاستەوخۆ بەستراوەتەوە بە (چۆنیەتی قسەکردن و تۆنی دەنگتەوە). کەواتە چۆن دەنگت بکەیتە کلیلێک بۆ کردنەوەی دڵی کڕیار و داخستنی فرۆشەکان؟ لەم وتارەدا بە ٥ خاڵ بابەتەکحە ڕوون دەکەینەوە: ١. زەردەخەنەیەک کە هەستی پێبکرێت: ڕەنگە سەیر بێت، بەڵام کڕیار دەتوانێت لە پشت تەلەفۆنەکەوە هەست بە گرژی یان زەردەخەنەی دەموچاوت بکات. کاتێک بە مۆنی و بێتاقەتی قسە دەکەیت، دەنگت گران و نەرێنی دەبێت. چارەسەری خێرا: پێش ئەوەی ژمارەکە لێبدەیت، هەناسەیەکی قووڵ هەڵکێشە و ڕوخسارت ئارام بکەرەوە. کاتێک بە ڕاستی زەردەخەنە دەکەیت، دەنگت دەکرێنەوە هەروەها گەرموگوڕی و وزەیەکی ئەرێنی لێ دەبارێت، ئەمەش یەکەم هەنگاوە بۆ شکاندنی بەستەڵەکی نێوان تۆ و کڕیارەکە. ٢. خێرایی قسەکردن: نە شەمەندەفەر بە نە کیسەڵ لە بازاڕی کوردستاندا، کڕیار پێویستی بە متمانەیە. ئەگەر زۆر خێرا قسە بکەیت، کڕیار وا هەست دەکات دەتەوێت شتێکی بەسەردا ساغ بکەیتەوە و ڕابکەیت، یان نیشانەی شڵەژانی تۆیە. ئەگەر زۆر خاویش بیت، کڕیار بێزار دەبێت و سەرنجی نامێنێت. هاوسەنگی: بە سەرەخۆ و بە ڕوونی وشەکان دەربڕە. کاتێک دەگەیتە خاڵە گرنگەکانی وەک (سوودی بەرهەمەکە یان نرخ)، کەمێک خێراییەکەت کەم بکەرەوە تا گرنگیی بابەتەکە بگات. ٣. بەرز و نزمیی دەنگ: خوێندنەوەی دەقێکی نووسراو بە یەک ئاستی دەنگ، بکوژی هەرە گەورەی فرۆشە. ئەگەر دەنگت هەمیشە لەسەر یەک هێڵی تەخت بێت، کڕیارەکە دوای ٣٠ چرکە گوێت لێ ناگرێت. تەکنیکی پێشکەوتوو: کاتێک باسی کێشەکانی کڕیار دەکەیت، تۆنی دەنگت با نیشانەی هاوسۆزی بێت (کەمێک نزم و لەسەرخۆ). کاتێکیش دەگەیتە چارەسەرەکە و دەتەوێت دڵنیایی بدەیت، تۆنی دەنگت با بەرزتر، پتەوتر و پڕ بێت لە دڵنیایی و حەماسەت. ٤. هونەری بێدەنگیی کاتی: زۆر کەس پێیان وایە فرۆشیاری سەرکەوتوو ئەو کەسەیە کە مەجالی هەناسەدان ناداتە کڕیار. بەڵام ڕاستییەکە پێچەوانەکەیەتی. بێدەنگیی کاتی (بۆ ماوەی ١ تا ٢ چرکە) دوای وتنی زانیارییەکی گرنگ، هێزێکی سیحرى بە قسەکانت دەبەخشێت. بۆ نموونە: دوای ئەوەی دەڵێیت: «ئەم سیستەمە %٣٠ی خەرجییەکانی کۆمپانیاکەت کەم دەکاتەوە...» (لێرەدا دوو چرکە بێدەنگ بە). ئەم بێدەنگییە دەرفەت دەداتە مێشکی کڕیارەکە کە بیر لە قەبارەی ئەو دەستکەوتە بکاتەوە. ٥. وەک کڕیار بە: مرۆڤەکان حەز دەکەن کڕین لەو کەسانە بکەن کە لە خۆیان دەچن. ئەگەر کڕیارەکەت کەسێکی بەتەمەن و لەسەرخۆ بوو، نابێت تۆ بە وزەیەکی گەنجانەی زۆر خێرا قسەی لەگەڵ بکەیت. بە پێچەوانەشەوە، ئەگەر کڕیارەکە گەنجێکی خێرا و بازرگان بوو، نابێت کاتی بە قسەی درێژ و خاو بگریت. یاساکە: لە چەند چرکەی یەکەمدا گوێ لە شێوازی قسەکردنی کڕیارەکە بگرە و بە شێوەیەکی سروشتی، خێرایی و تۆنی دەنگت لەگەڵ ئەودا هاوئاهەنگ بکە. دەرئەنجام لە فرۆشی تەلەفۆنیدا، بەرهەمەکەت هەرچەندە بەهێز بێت، ئەگەر بە: تۆنێکی لاواز شەرمن پێداگر و بێزارکەر پێشکەش بکرێت، شکست دەهێنێت. دەنگی تۆ دەربڕی متمانە بەخۆبوون و ڕاستگۆیی تۆیە. کاتێک فێری کۆنترۆڵکردنی تۆنی دەنگت دەبیت، دەبینیت کە چۆن ڕێژەی ڕەتکردنەوەی پەیوەندییەکانت کەم دەبێتەوە و کڕیارەکان بە متمانەیەکی زیاترەوە گوێت بۆ دەگرن.