script Archives

سکریپتی فرۆش چییە؟ چەکە نهێنییەکەی پشت تەلەفۆنە سەرکەوتووەکان زۆرجار کاتێک کارمەندێکی لێهاتووی فرۆشتن تەلەفۆنت بۆ دەکات، هەست دەکەیت زۆر بە ڕەوانی، بەبێ دوودڵی و قۆناغ بە قۆناغ قسەت لەگەڵ دەکات و ڕاتدەکێشێتە ناو بابەتەکەوە. ئایا ئەمە تەنها بەهرەیەکی زگماکییە؟ نەخێر، لە پشت ئەم سەرکەوتنەوە چەکێکی ستراتیژی هەیە کە پێی دەوترێت سکریپتی فرۆشتنی تەلەفۆنی (Sales Script). لە بازاڕی کوردستاندا، زۆربەی بزنسەکان وا دەزانن فرۆشی تەلەفۆنی تەنها ئەوەیە مۆبایلەکە هەڵبگریت و بەپێی مەزاجی ئەو چرکەیەت قسە بکەیت. بەڵام ڕاستییە زانستییەکە ئەوەیە کە بەبێ نەخشەیەکی پێشوەختە، زۆربەی پەیوەندییەکان بە شکست کۆتایی دێن. سکریپتی فرۆشتنی تەلەفۆنی چییە؟ بە زمانێکی سادە، سکریپت بریتییە لە: (نەخشەی ڕێگای کورت و نووسراو بۆ پەیوەندییە تەلەفۆنییەکان). دەقێکی پێشوەختە ئامادەکراوە کە خاڵە سەرەکییەکانی گفتوگۆکە دەستنیشان دەکات. ئەم دەقە تەنها ڕیزکردنی چەند ڕستەیەک نییە، بەڵکو قۆناغەکانی پەیوەندییەکە ڕێکدەخات: چۆن سڵاو بکەیت؟ چۆن کێشەی کڕیارەکە دەستنیشان بکەیت؟ چۆن بەرهەمەکەت وەک چارەسەر پێشکەش بکەیت؟ چۆن وەڵامی ناڕەزایەتییەکان (وەک: نرخەکەی گرانە، یان کاتم نییە) بدەیتەوە؟ بۆچی بزنسەکەت پێویستی بە سکریپت هەیە؟ ١.کۆتاییهێنان بە شەرم و شڵەژان: گەورەترین ترسی کارمەندی فرۆشتن ئەوەیە کاتێک کڕیارەکە پرسیارێکی کتوپڕ دەکات، ئەم نەزانێت چی بڵێت. سکریپت وەک قەڵغانێک وایە کە وەڵامی زۆرێک لە ئەگەرەکانی تێدا ئامادەکراوە. ٢.پاراستنی کاتی کڕیار: لە بازاڕی ئەمڕۆدا، کڕیار تاقەتی قسەی لێڵ و درێژی نییە. سکریپت یارمەتیت دەدات لە کەمترین کاتدا، بەهێزترین پەیام بگەیەنیت. ٣.یەکخستنی کوالیتی بزنسەکەت: ئەگەر پێنج کارمەندی فرۆشتنت هەبێت، بوونی سکریپت گەرەنتی ئەوە دەکات کە هەر پێنجییان بە یەک ئاستی بەرز، پڕۆفیشناڵ و بەڕێز نوێنەرایەتی براندەکەت دەکەن لەبەردەم کڕیاردا. نھێنییەکی گرنگ: سکریپت بەکاربهێنە، بەڵام وەک ڕۆبۆت مەبە! گەورەترین هەڵە کە وا دەکات کڕیار دەستبەجێ تەلەفۆنەکە دابخاتەوە، ئەوەیە کارمەندەکە وەک ئەوەی پارچە شیعرێک بخوێنێتەوە، بێهەست و وشک دەقی سەر کاغەزەکە بخوێنێتەوە. سکریپتی سەرکەوتوو یاسا و کۆت نییە، بەڵکو تەنها ڕێبەرێکە. پێویستە تۆنی دەنگت زیندوو، دۆستانە و سروشتی بێت. کلیلەکە لێرەدا ئەوەیە: گوێگرتن لە کڕیارەکە ٪٨٠ بێت و قسەکردنی تۆ بەپێی سکریپتەکە ٢٠٪ بێت. خاڵێکی گرنگ: کاتێک دەڵێین سکریپ باشە هەبێت مەبەستمان لەوەیە کە دەبێت قاڵبێک هەبێت کە بتوانن فرۆشیاران بیدەن لە قسەکانیان تا قاڵبێکی پیشەی و ڕاست وەربگرێت، ئەگەرنا تۆ گفتوگۆ لەگەڵ مرۆڤ دەکەیت ئەگەری ئەوەی پرسیاری سەیر و جیاوازت لێبکرێت ئەگەرێکی بەرزە. ئەم قاڵبە تەنها هێڵەکان و سەرەتا و کۆتاییت بۆ ڕێک دەکات، وردەکاری زیاتر دەکەوێتە سەر توانایی فرۆشیارەکە و پرسیاری کڕیار. دەرەنجام سکریپتی فرۆشتنی تەلەفۆنی، جیاکەرەوەی نێوان بزنسی سەرکێش و بزنسی پڕۆفیشناڵە. کاتێک کارمەندەکانت بە ئامادەکراوی دەچنە ناو گفتوگۆوە، ڕێژەی ڕازیبوونی کڕیارەکان و بەرزبوونەوەی فرۆش لە بزنسەکەتدا بە شێوازێکی بەرچاو بازدەدات. ئەگەر دەتەوێت تەلەفۆنەکانت ببنە پارە، کاتی هاتووە نەخشەی قسەکردنت بنووسیتەوە.