چۆن ژمارە و داتا ساردەکان بگۆڕین بۆ کڕین؟
هەموو ڕۆژێک لە کوردستان، بەسەدان پەیوەندیی فرۆشتن ئەنجام دەدرێن. زۆربەی ئەم پەیوەندییانە بەم ڕستەیە کۆتاییان دێت:
- سوپاس، کاتم نییە.
- ئەگەر پێویستم بوو خۆم پێوەندیتان پێوە دەکەمەوە.
وەک نوێنەرێکی فرۆشتن، یان خاوەن کارێک، ڕەنگە پێت وابێت کێشەکە لە نرخەکەتە یان کڕیارەکە پارەی پێ نییە، بەڵام لە ڕاستیدا کێشەکە شتێکی ترە؛ تۆ تەنیا (داتا و زانیاریی وشک) دەفرۆشیت، نەک متمانە و چارەسەر!
مرۆڤ بە سروشتی خۆی حەزی بە ژمارە و تایبەتمەندیی تەکنیکی نییە، بەڵکو حەزی لە چیرۆکە. لەم بابەتەدا فێری ئەوە دەبین کاتێک بە تەلەفۆن قسە لەگەڵ کڕیارێکی کورد دەکەین (چی گەنجێکی ١٨ ساڵ بێت یان خاوەنکارێکی ئەزموونداری ٦٠ ساڵ)، چۆن زانیارییە ساردەکان بگۆڕین بۆ چیرۆکێکی گەرم و سەرنجڕاکێش کە ببێتە فرۆش.
لەم وتارەدا بە ٤ خاڵ ڕوونی دەکەینەوە:
١. کڕیار بە سۆز دەیکڕێت، بە عەقڵ پاساوی بۆ دەهێنێتەوە:
یەکەم یاسای زێڕین لە فرۆشتنی تەلەفۆنیدا ئەوەیە: خەڵک تایبەتمەندیی بەرهەمەکە ناکڕن، بەڵکو ئەو هەستە دەکرن کە بەهۆی بەرهەمەکەوە بۆیان دروست دەبێت.
کاتێک دەتەوێت سیستمی کامێرای چاودێری یان ئامێری غازی ماڵان بفرۆشیت، مەڵێ: (ئەم ئامێرە مۆدێلی وایە و ئەوەندە مێگاپێکسڵە و لە فڵان وڵات دروست کراوە)، ئەمە داتایەکی ساردە. لە جیاتی ئەوە چیرۆکێکی کورت بگێڕەوە:
( کاک محمد، ئامانج لەم سیستمە تەنیا کامێرا نییە، بەڵکو ئەوەیە کاتێک شەو لە دەرەوەی ماڵیت یان لە گەشتێکیت، بە دڵێکی ئارامەوە و بە تەلەفۆنەکەت سەیری ماڵ و منداڵت بکەیت و بزانیت هەموو شتێک سەلامەتە).
٢. چیرۆکی (کڕیاری پێشوو) وەک خاڵێکی بەهێز:
باشترین ڕێگە بۆ ڕازیکردنی کڕیاری نوێ، گێڕانەوەی سەرکەوتنی کڕیارێکی کۆنە. کاتێک کڕیارەکە دوودڵە، چیرۆکێکی ڕاستەقینەی بازاڕی خۆمانی بۆ باس بکە.
داتای سارد (هەڵە): کۆرسەکەی ئێمە ١٢ وانەیە و زۆر بەسوودە بۆ پەرەپێدانی کارەکەت.
چیرۆکی سەرنجڕاکێش (ڕاست): کاکە گیان، مانگی ڕابردوو کڕیارێکمان هەبوو هاوتەمەنی خۆت بوو، لە بازاڕ دوکانی هەبوو. سەرەتا دەیگوت کاتم نییە بۆ کۆرس، بەڵام کاتێک تەنیا دوو تەکنیکی ناو ئەم کۆرسەی جێبەجێ کرد، فرۆشی دوکانەکەی لەم مانگەدا لە %٣٠ زیادی کرد.
تێبینی:
تەمەنی کڕیارەکە گرنگ نییە؛ گەنج بێت یان بەتەمەن، کاتێک دەبینێت کەسێکی تر هاوشێوەی ئەو سوودی لە بەرهەمەکەت بینیوە، متمانەی لا دروست دەبێت.
٣. گێڕانەوەی چیرۆک لە تەلەفۆندا:
بۆ ئەوەی چیرۆکەکەت کورت و کاریگەر بێت و کڕیارەکە بێزار نەکات (چونکە کاتی تەلەفۆن کەمە)، ئەم سێ هەنگاوە پەیڕەو بکە:
١. کێشەکە: باسی کێشەیەک بکە کە کڕیارەکە پێوەی دەناڵێنێت. (نموونە: خۆت دەزانیت ئێستا تێچووی ڕیکلام زۆر گران بووە و کڕیاریش کەمە…).
٢. چارەسەرەکە: لێرەدا بەرهەمەکەت وەک فریادڕەس نیشان بدە. (ئێمە سیستمێکمان داناوە کە بەبێ ڕیکلامی گرانبەها، کڕیاری کۆن دەگەڕێنێتەوە بۆ لای تۆ…).
٣. ئەنجامەکە: باسی ئەو ئاسوودەیی یان قازانجە بکە کە دەستی دەکەوێت. (ئێستا خاوەن کارەکە بە دیار چایەکەیەوە دانیشتووە و تەنیا نامەی داواکاریی کڕیارەکان وەردەگرێت).
٤. زمانەکەت بگونجێنە لەگەڵ تەمەنی کڕیارەکەدا:
لە بازاڕی کوردستاندا، شێوازی قسەکردن لەگەڵ گەنجێکی ١٨ ساڵ و پیاوێکی بەتەمەنی ٦٠ ساڵ جیاوازە.
چیرۆکەکەت دەبێت کلیلە وشەی گونجاوی تێدا بێت:
بۆ تەمەنی ١٨ تا ٣٥ ساڵ: زیاتر جەخت لەسەر
- داهاتوو.
- خێرایی.
- مۆدێرن بوون.
- پەرەپێدانی خوود.
بکەرەوە. لێرەدا چیرۆکەکە باسی سەرکەوتن و کەمکردنەوەی ماندووبوون بێت.
بۆ تەمەنی ٣٦ تا ٦٠ ساڵ: ئەم تەمەنە زیاتر حەزی بە:
- ئارامیی مێشک.
- کەمکردنەوەی سەرکێشی.
- پاراستنی سەرمایە.
- دڵنیایی.
هەیە. وشەی وەک (یاسایی، گەرەنتی، ئەزموون، و بێ سەرئێشەیی) لە چیرۆکەکەتدا بەکاربهێنە.
ئەنجام:
ژمارەکان تەنیا دەسەلمێنن، بەڵام چیرۆکەکان دەفرۆشن.
پەیوەندیی تەلەفۆنی تەنیا خوێندنەوەی دەقێکی نووسراو نییە کە لەبەر کرابێت. کاتێک تەلەفۆنەکە هەڵدەگریت، وەک ڕۆبۆتێک سەیری کڕیارەکە مەکە. زانیارییەکانت لە قالبی چیرۆکێکی کورت و شیرینی کوردی پێشکەش بکە.
ڕێگەی پێ بدە خۆی لە ناو چیرۆکەکەدا ببینێتەوە؛ ئەو کاتە دەبینیت کە چۆن داتا ساردەکان دەبن بە گرێبەستی گەرم و فرۆشتنی وێبسایت و کۆمپانیاکەت چەند هێندە بەرز دەبێتەوە.