مەترسییەکانی بزنس، بزنس،کەمکردنەوەی مەترسییەکان، بازاڕ Archives

چۆن مەترسییەکانی بزنس کەمبکەینەوە؟ نەهێشتنی تەواوی مەترسییەکان لە بزنسدا ئەستەمە، چونکە بێ مەترسی هیچ قازانجێک بەدەست ناهێنرێت. بەڵام فرۆشیار و خاوەن بزنسە زیرەکەکان لە شوێنی نەهێشتن، کار لەسەر (بەڕێوەبردن و کەمکردنەوەی مەترسییەکان) دەکەن. ئەگەر دەتەوێت مەترسییەکانی بزنسەکەت بگەیەنیتە نزمترین ئاست، ئەم ٥ هەنگاوە کردارەکییە جێبەجێ بکە: ١. هەمەجۆرکردنی بەرهەم و کڕیاران: پشت بە یەک بەرهەم، یەک دابینکەر یان یەک جۆر کڕیار مەبەستەوە. ئەگەر تەواوی داهاتت لە یەک سەرچاوەوە بێت و ئەو سەرچاوەیە تووشی کێشە ببێت، بزنسەکەت دەکەوێتە مەترسییەوە. فرۆشتنی بەرهەمی جیاواز و ئامانجگرتنی چەند جۆرێکی جیاوازی کڕیاران، هێڵی پاراستنی بزنسەکەتە. تێبینی گرنگ: کە دەڵێن هەمەجۆری لە کڕیار و بەرهەم، مەبەستمان لەوە نییە هەموو کەس کڕیاری تۆ بێت و هەموو کاڵایەکت لای دەستبکەوێت. بەڵکو مەبەستمان لەو کاڵا و کڕیارانەیە کە لە سنوری بزنسەکەی خۆتدان. ٢. بەڕێوەبردنی پارە: یەکێک لە گەورەترین مەترسییەکان، نەمانی نەقدییە (کاش). بەردەوام بڕێک پارە وەک (سندوقی نەقدی فریاگوزاری) هەڵبگرە کە لانی کەم تێچووی ٣ بۆ ٦ مانگی بزنسەکەت دابین بکات. ئەمە یارمەتیدەر دەبێت لە کاتی قەیرانی ئابووری یان سستبوونی بازاڕدا بەپێوە بمیەنیتەوە. ٣. تێگەیشتن لە بازاڕ و ڕەفتاری کڕیار: زۆربەی بزنسەکان بەهۆی ئەوەوە شکست دەهێنن کە بەرهەمێک دروست دەکەن کڕیار پێویستی پێی نیە. پێش هێنانی هەر بەرهەمێک یان دەستپێکردنی خزمەتگوزارییەکی نوێ، بازاڕەکە بپشکنە و پرسیار لە کڕیاران بکە تا بزانیت بەڕاستی داواکاریی لەسەر هەیە یان نا. بۆ نموونە: ئەگەر دەتەوێت بەرهەمێکت بۆ خاوەن پێداویستییەکی تایبەت هەبێت( کەمبیستێک)، دەبێت بزانیت: لە ناوچەکەت چەند کەس هەن کەمبیستن؟ چەندیان ئەو بەرهەمەی تۆ گونجاوە بۆی؟ چەند کەس توانای کڕینی ئەو بەرهەمەی تۆی هەیە؟ چەند کەس ئامادەیە بیکڕێت؟ ٤. گەرەنتی و دروستکردنی متمانە: لە ڕووی فرۆشتنەوە، مەترسیی کڕیار کەمتەر بکەرەوە. کاتێک گەرەنتی گەڕاندنەوەی پارە یان گۆڕینی بەرهەم دەدەیت، مەترسیی بڕیاردان لەسەر شانی کڕیار هەڵدەگریت و دەیکەیتە سەر شانی خۆت. ئەمە متمانە دروست دەکات و فرۆشت زۆر زیاتر دەکات. ٥. خۆگونجاندن لەگەڵ گۆڕانکارییەکاندا: بازاڕ بە بەردەوامی لە گۆڕاندایە (وەک تەکنەلۆجیا، ڕکابەرە نوێیەکان، یان یاساکان). هەتا بزنسەکەت نەرمتر بێت و خێراتر لەگەڵ گۆڕانکارییەکان بگونجێت، مەترسیی دواکەوتن و لەناوچوونی کەمتر دەبێتەوە. کەواتە! مەترسی بەشێکە لە یاریی بزنس. کەمکردنەوەی مەترسی تەنها بە پلانڕێژی، بەڕێوەبردنی دارایی و تێگەیشتن لە حەز و کێشەکانی کڕیار دەکرێت.