فرۆشی تەلەفۆنی، گرانە، بازاڕی کوردستان، کڕیار Archives

چۆن لە فرۆشتنی تەلەفۆنیدا مامەڵە لەگەڵی (گرانە) دەکەیت؟ لە فرۆشدا ڕووبەڕووبوونەوەی ناڕەزایەتی و ڕەتکردنەوەکان بەشێکی دانەبڕاوە لە پرۆسەی ڕۆژانە. یەکێک لە باوترین و دووبارەترین ئەو کۆسپانەی کە ڕووبەڕووی تیمی فرۆشی تەلەفۆنی دەبێتەوە، بیستنی دەستەواژەی (گرانە)یە لەلایەن کڕیارەوە. لە بازاڕی کوردستاندا، ئەم وشەیە هەمیشە بە مانای ڕەتکردنەوەی کۆتایی نایەت، بەڵکو زۆرجار ئاماژەیە بۆ ئەوەی کە کڕیار هێشتا بەهای ڕاستەقینەی بەرهەمەکە یان خزمەتگوزارییەکەی بۆ ڕوون نەبووەتەوە و پێویستی بە دڵنیایی زیاتر هەیە. شێوازی وەڵامدانەوەی تیمی فرۆشتن بۆ ئەم وەڵامە، هێڵی جیاکەرەوەی نێوان سەرکەوتنی مامەڵەکە یان لەدەستدانی کڕیارەکەیە بۆ هەمیشە. لەم وتارەدا بە ٤ خاڵ مامەڵەکردنێکی سەرکەوتوو لەگەڵ کێشەی نرخ لە ڕێگەی تەلەفۆنەوە، دەخەینەڕوو: ١. دانپێدانان و هاوسۆزی: گەورەترین هەڵە کە فرۆشیار لە سەرەتای کارەکەیدا تێیدەکەوێت، دادگاییکردنی کڕیارەکەیە یان وەڵامدانەوەیەتی بە شێوازێکی بەرگریانە و توند. یەکەم هەنگاو لەم قۆناغەدا بریتییە لە: شکاندنی بەربەستی دەروونی کڕیار لە ڕێگەی نیشاندانی هاوسۆزییەوە. پێویستە کڕیار هەست بکات کە لایەنی بەرامبەر ڕێز لە پارە و بودجەکەی دەگرێت. بۆ جێبەجێکردنی ئەمەش، دەکرێت بەکارهێنانی ڕستەیەک کە متمانە دروست بکات سوودی هەبێت، وەک: (تێدەگەم لە ئێوە و ڕاست دەفەرموون، بێگومان نرخ هەمیشە هۆکارێکی سەرەکییە لە بڕیارداندا، زۆر لە کڕیارەکانی تریشمان لە سەرەتادا هەمان تێبینییان هەبوو...) ٢. گۆڕینی هاوکێشەکە لە نرخەوە بۆ بەها: کاتێک کڕیار تەنها سەیری ژمارەکان دەکات، ئەرکی سەرەکی فرۆشیار گۆڕینی سەرنجی کڕیارەکەیە بۆ سەر ئەو کێشەیەی کە بەرهەمەکە بۆی چارەسەر دەکات. ئەگەر بەهای بەرهەمەکە لە لای کڕیار گەورەتر بێت لەو نرخەی بۆی دیاریکراوە، پرۆسەی کڕین بە شێوەیەکی خۆرسک ئەنجام دەدرێت. لەم قۆناغەدا پێویستە جەخت لەسەر: کوالیتی. گەرەنتی پاش فرۆشتن. تەمەنی درێژی بەرهەمەکە بکرێتەوە. کە لە داهاتوودا ڕێگری لە خەرجی دووبارە دەکات. بۆ نموونە دەکرێت بگوترێت: (...بەڵام کاتێک بەرهەمەکەیان بەکارهێنا، بۆیان دەرکەوت کە کوالیتی و گەرەنتییەکەی وای کردووە لە درێژخایەندا تێچووی چاککردنەوەی بۆ بگێڕێتەوە، ئەمەش وای کردووە کڕینەکە ببێتە وەبەرهێنانێک نەک خەرجی). ٣. تەکنیکی بچووککردنەوە: زۆرجار کاتێک کڕیار بڕی کۆتایی نرخەکە بە یەکجار دەبیستێت، بە لایەوە قورس دەبێت. پڕۆفیشناڵەکانی بواری فرۆشتن لەم کاتەدا سوود لە تەکنیکی بچووککردنەوەی تێچوو وەردەگرن بۆ بڕی کەمتر (وەک تێچووی مانگانە یان ڕۆژانە) تا کۆی بڕەکە لە مێشکی کڕیاردا بچووک بێتەوە. ئەمەش لە ڕێگەی دابەشکردنی نرخەکە بەسەر ماوەکەی. بۆ نموونە: (ئەگەر سەیری تێچووی گشتی بکەین، ڕەنگە نرخێکی زۆر بێت، بەڵام ئەم بەرهەمە لانی کەم بۆ ماوەی ساڵێک خزمەتت دەکات. ئەگەر دابەشی بکەینە سەر ڕۆژەکانی ساڵ، تێچووەکەی دەبێتە کەمتر لە نرخی کڕینی پێداویستییەکی ڕۆژانە، لەبەرامبەردا کێشەیەکی گەورەی کارەکەت بۆ هەمیشە چارەسەر دەکات). نموونەیەکی تر: (ئەگەر کاڵاکە نرخی ١٠٠ دۆلار بێت وە کڕیار بڵێت گرانە، دەتوانین بڵێت: ڕاست دەفەرموون کە سەیری ١٠٠ دۆلار بکەین گرانە بەڵام ئەگەر سەیری ماوەی بەکارهێنانی بکەین کە بۆ ساڵێک ئیش دەکات ڕۆژێک ٥٠٠ دیناری خۆمانی بەرناکەوێت). ٤. بەکارهێنانی پرسیاری کراوە بۆ دۆزینەوەی هۆکاری ڕاستەقینە: پێویستە فرۆشیار بزانێت ئایا وشەی (گرانە) تەنها ڕەفتارێکی کلتووری کڕیارە بۆ دەستکەوتنی داشکاندن، یان بەڕاستی کێشەی نەبوونی بودجەی هەیە؟. لێرەدا پرسیارە کراوەکان گفتوگۆکە ڕوون دەکەنەوە. پرسیارێکی زیرەکانە دەبێتە کلیل، وەک: بۆ ئەوەی بتوانم باشتر هاوکاریت بکەم، دەتوانم بپرسم ئایا نرخەکە لە دەرەوەی ئەو بودجەیەیە کە خۆت داتناوە، یان هێشتا تەواو دڵنیا نیت کە ئەم خزمەتگوزارییە بۆ تۆ گوونجاوە؟. دەرئەنجام کڕیار پێش کڕینی بەرهەمەکە، پێویستی بە دروستکردنی متمانە و هەستکردن بە ڕێز هەیە. وشەی (گرانە) کۆتایی گفتوگۆکە نییە، بەڵکو دەستپێکی پرۆسەی ڕاستەقینەی فرۆشتن و ڕاوێژکارییە. کاتێک تیمی فرۆشتن بە شێوازێکی پیشەی، ئارام و پڕ لە ڕێزەوە وەڵامی ئەم تێبینییە دەداتەوە، گومانەکانی کڕیار دەگۆڕێت بۆ دڵنیایی و دواجار کڕینەکە بەسەرکەوتوو کۆتایی دێت.