فرۆش چییە؟
زۆربەی خەڵک کاتێک گوێبیستی وشەی فرۆش دەبن، یەکسەر بیریان بۆ ئەوە دەچێت کە کەسێک بە زۆر یان بە قسەی خۆش هەوڵدەدات کاڵایەک یان خزمەتگوزارییەک بەسەر کەسێکی تر ساغبکاتەوە!
بەڵام ئایا فرۆش چییە لە ڕاستیدا؟
ئایا فرۆشتن تەنها ئاڵوگۆڕی پارە و کاڵایە، یان بابەتی زۆر قووڵتر لە پشت ئەم پڕۆسەیەوە هەیە؟
لە بزنسدا، تێگەیشتن لە مانا و وشەی فرۆش کلیلی سەرکەوتنی هەر خاوەنکار و فرۆشیارێکە.
لەم وتارەدا بە ٤ خاڵ ڕوونی دەکەینەوە کە فرۆش چییە و گرنگی چییە لە بزنسدا:
١.فرۆش چییە؟
بە کورتترین پێناسە: فرۆش بریتییە لە پڕۆسەی دۆزینەوەی پێویستییەکانی کڕیار و پێشکەشکردنی چارەسەری گونجاو بە جۆرێک کە کڕیار متمانە بکات و بكڕێت.
فرۆش تەنها مامەڵەیەکی دارایی نییە، بەڵکو پڕۆسەیەکی دروستکردنی پەیوەندی و متمانەیە. کاتێک تۆ تێدەگەیت کڕیارەکەت چ کێشەیەکی هەیە و بەرهەمەکەی تۆ چۆن ژیانی ئاسانتر یان خۆشتر دەکات، لێرەدا پڕۆسەی فرۆشتنی ڕاستەقینە ڕوودەدات.
٢. جیاوازی نێوان فرۆشی دروست و بێزارکردنی کڕیار:
کاتی خۆی وا تێگەیەنرابووین کە فرۆشیاری باش ئەو کەسەیە کە زۆر قسە دەکات و کڕیاری پێ ڕازیی دەکرێت. بەڵام زانستی نوێی بزنس دەیسەلمێنێت کە ئەمە هەڵەیەکی گەورەیە.
فرۆشی هەڵە (بێزارکەر): هەوڵدان بۆ سەپاندنی کاڵا بەسەر کڕیاردا بێ ئەوەی بزانیت ئایا بە کەڵکی دێت یان نا.
فرۆشی دروست (پیشەیی): گوێگرتن لە کڕیار، تێگەیشتن لە کێشەکەی، و پێشنیازکردنی چارەسەرێکی گونجاو.
٣. فرۆش لەسەر چی وەستاوە؟
بۆ ئەوەی بە تەواوی لەوە بگەیت فرۆش چییە، دەبێت بزانیت فرۆش لەسەر سێ کۆڵەکەی سەرەکی وەستاوە:
١.تێگەیشتن لە کڕیار: مرۆڤەکان بەپێی هەست و سۆز بڕیاری کڕین دەدەن و دواتر بە عەقڵ و لۆژیک پاساوی بۆ دەهێننەوە.
٢.بەهای ڕاستەقینە: کڕیار پارە بە کاڵاکە نادات، بەڵکو پارە بەو بەها و سوودە دەدات کە لە کاڵاکەوە دەستی دەکەوێت.
٣.دروستکردنی متمانە: بێ متمانە هیچ فرۆشێک ڕوونادات. کڕیار پێش ئەوەی بەرهەمەکەت بکڕێت، دەبێت متمانەی بە تۆ و براندەکەت هەبێت.
٤. بۆچی تێگەیشتن لە فرۆش بۆ بزنسەکەت گرنگە؟
ئەگەر باشترین بەرهەم یان باشترین خزمەتگوزاریشت لە جیهاندا هەبێت، بەڵام نەزانیت فرۆش چییە و چۆن پڕۆسەی فرۆشتن بەڕێوەدەبرێت، بزنسەکەت ناتوانێت بەردەوام بێت.
فرۆش بریتییە لە شادەماری هێنانەژوورەوەی داهات بۆ ناو هەر کۆمپانیا یان فرۆشگایەک.
دەرئەنجام
لە کۆتاییدا، فرۆش هونەری یارمەتیدانی خەڵکە بۆ کڕینی ئەو پێویستیانەی کە هەیانە. کاتێک بیرکردنەوەی خۆت بۆ فرۆش لە (دەستبڕین یان ڕازی کردنی بەزۆر)ەوە دەگۆڕیت بۆ (تێگەیشتن و چارەسەرکردنی کێشە)، نەک تەنها فرۆشت زیاتر دەبێت، بەڵکو کڕیاری وەفاداریش بۆ بزنسەکەت دروست دەکەیت.