سترێس دۆخێکە کە لە دوودڵی و شەرم و ترسەوە سەرچاوە دەگرێت. بەنزیکەیی هەموو مرۆڤەکان لەژیانیاندا تووشی فشارێکی زۆر دەروونی دەبن. فشار چەند جۆرێکی هەیە، لەوانە: فشاری زۆر کارکردن و نیگەرانی دارایی و بەرپرسیارێتی خێزان، یان لەوانەیە هۆکاری تایبەتتر هەبێت، وەک نەخۆشی و بێکاری یان لەدایکبوونی منداڵ یان وەرگرتنی قەرز. بەداخەوە تا ئێستا لە کوردستاندا هیچ ڕێنماییەکی گشتی بۆ مامەڵەکردن لەگەڵ فشاردا نییە. هاوڕێ نزیکەکەت هەموو ئەوەی کە دەیکات، پێت دەڵێت ئارامبە و دنیا فشەیە، ئازارەکانت چارەسەر ناکات. بۆ ئەوەی بتوانیت بە شێوەیەکی کاریگەر بەرەنگاری فشاری دەروونی ببیتەوە، پێویستە فێری شێواز و ستراتیژییەکانی بەڕێوەبردنی فشار بیت.
ئەمڕۆ ١٠ هۆکاری زۆر گرنگ و پێویست باس دەکەین کە دەبنە هۆی کەمکردنەوە یان زاڵبوون بەسەر فشاردا:
1- ئارام بە
گوێگرتن بۆ قورئان یان مۆسیقا، وەرزشکردن، ئەنجامدانی یۆگا یان هەر کردارێک کە ئارامت دەکاتەوە.
2- گوێ بۆ هەواڵ مەگرە
گوێگرتن بۆ هەواڵە خەمناک و ترسناکەکان، جۆرێکە لە ئەشکەنجەدانی دەروون. بێ یەک و دوو لێی دووربکەوەرەوە.
3- خەوتنی پێویست
زوو بخەویت و زوو هەستیت، دڵنیابە کە پشوویەکی تەواو وەردەگریت.
4- ڕزگاربوون لە نیگەرانییە ناپێویستەکان
پێویستە جیاوازی بکەیت لە نێوان بابەتی گرنگ و ناگرنگ.
5- زۆر توڕە مەبە
ئەگەر توڕە بوویت، کۆنتڕۆڵی بکە پێش ئەوەی ببێتە شتێکی وێرانکەر.
6- ڕێکوپێک بە
کۆنتڕۆڵی دەوروبەرت هەبێت، قەرەباڵغی و سەرلێشێواوی لە ژیاندا دەبێتە هۆی فشاری دەروونی.
7- بەشێوەیەکی کاریگەر کاتەکانت بەڕێوەببە
فێربە چۆن کاتەکانت بە شێوەیەکی کاریگەر بەکاربهێنیت. خشتەی ڕۆژانەت کۆنتڕۆڵ بکە.
8- تۆڕێکی پشتگیری لە دەوروبەرت دروست بکە
کات بەسەربەرە لەگەڵ خێزان و هاوڕێ و ناسراوەکان، بەدوای کەسانێکدا بگەڕێ لە ژیاندا کە گوێت لێدەگرن و گرنگیت پێدەدەن.
9- بە بەهاکانت بژی
بزانە چی بۆ تۆ گرنگە و چی گرنگ نییە. دڵنیابە ئامانجەکانت گرنگن و شایانی ئەوەن هەوڵیان بۆ بدەی.
10- گاڵتەجاڕ بە
بە کێشە و نیگەرانییەکانی ژیان پێبکەنە، بە خۆت پێبکەنە و شتەکان زۆر بە جددی وەرمەگرە.
جگە لە پەیڕەوکردنی ئەم خاڵانە، دەتوانیت خووی کۆنت بگۆڕیت و خووی نوێ دروست بکەیت. مامەڵەکردن لەگەڵ فشاردا سیحر نییە؛ بەڵکو مانای فێربوونی ڕەفتاری نوێ و بەدەستهێنانی دیدگای نوێیە سەبارەت بە خۆت و جیهانی دەوروبەرت.
ئامادەکردن: ستافی کارسازی شادمان